Амстердам хотиралари — 93

«Кўнгилга ташриф» туркумидан

Туш

Отам билан дарада от чоптириб кетяпмиз,

«Қора қарға»дан ўтиб ялангликка етяпмиз,

Ҳув қояда кутаётир онам бўлиб интизор.

Она каби меҳрибон дунёда яна ким бор?

Айғир отим жиловини мен онамга бераман.

Зулфи гажак лолаларни шоша-шоша тераман,

Зангори майсалардан оша-оша тераман,

Ял-ял ёнган гулларни сўнг онамга бераман. 

……………………………………………………………

Хуш қолинг кетаяпман, — дейман онамга қараб

Онам айтар, кетма қизим, сенсиз куним қировли,

Кўнгилэлтар қизимсан, тиловли болам жиловли…

Мен айтаман, омон юрсам, ҳали яна қайтаман,

Пойингизга аста чўкиб, мен баётлар айтаман…

Айғир отда кетяпман, хуржунда тоғ лоласи,

Кўнгил тиниб қоляпти, мен ахир тоғ боласи.

Ортда қолиб кетаётир, онам бўзлаб айтаётир:

Тиловли болам жиловли, сенсиз куним қировли…

06-03-2017